नशा
नशा झन करबे भइया
जिनगी खुवार हो जाथे
नइ तो बांचय कांही
सबो जिनिस बाजार बेंचाथे
जांगर टोर कमाये संगी
तैंहा गरवा बरोबर
पइसा पाये तहां किंजरे तैं
मंद महुंआ के चक्कर
कमई खवई छुट जाथे
नशा म ज़िनगी नाश हो जाथे
नइ तो बांचय कांही
घर दुवार सबो बेंचाथे ।।
दाई ददा के बुढ़तकाल के
तैंहर सहारा हस
लोग लइका के सुघ्घर
भविष्य के तैं अधारा हस
जे घर नशा म बुड़ जाथे
लोग लइका भुखन रही जाथे
नइ तो बांचय कांही
खेत खार तको बेंचाथे ।।
टप टप जइसे महुंआ गिरथे
धीर धीर तोला गिराही
बीड़ी पीये, धुंआ उड़े
जिनगी ल धुंआ धुंआ बनाही
नशा म सब बिगड़ जाथे
फेर कोन्हों नंइ सहुंराथे
नइ तो दिखय कांही
चारो मुड़ा अंधियार हो जाथे।।
नयताम हिरेश्वर "बस्तरीहा"
