मोर बस्तर के माटी ये
ऊंच ऊंच रुखवा राई
बड़े बड़े डोंगरी पहाड़ी
नदिया नरवा कछार
जंगल झाड़ी हे रे।। मोर बस्तर के माटी ये
मोर बस्तर के माटी ये रे
मोर बस्तर के माटी ये।।
सरई सागोन महुआ चार
मन ल भाथे खेती खार
कोदो कुटकी उपजय धान
महुआ लाटा सुग्गर पकवान
उड़ीद हिरवा कांदा कुसा
छिंद महुआ सल्फी रसा
टिकुर लांदा मढ़ीया पेज
चटनी चपोड़ा चांटी के रे।।
मोर बस्तर के माटी ये
पेन कर्रसाड़ अऊ रेला पाटा
बस्तरहिन दाई दंतेवाड़ीन माता
आंगा छत्तर डांग डोली
हल्बी भतरी गोंडी के बोली
गांव गांव बुमियार जिम्मिदारीन
गांयता मांझी पटेल सियानी
मावली माय,भंगार माई बइठे
१२भांवर केशकाल घाटी ये।।
मोर बस्तर के माटी ये।
चटका चुटकुली हुल्की मांदर
कोलांग पर्रांग नांचय झुमर
बारसुर कुटुमसर चितेरकोट
देखे बर आंथय दुर दुर से लोग
जिला कयंकर कोंडागांव जगदलपुर
सुकमा कोंटा दंतेवाड़ा नारायणपुर
बोहाथे डंकिनी शंखिनी इन्द्रावती
लागे छत्तीसगढ़ के सांटी ये रे।।
मोर बस्तर के माटी ये।
मोर बस्तर के माटी ये रे।
मोर बस्तर के माटी ये।।
नयताम हिरेश्वर
कोई टिप्पणी नहीं:
एक टिप्पणी भेजें